Mittarfeqarfiit aamma Kalaallit Airports suleqatigiinnermik sakkortusaapput

Nuup mittarfiata pisortaa, Rita Müller commissioning-projektlederitut atorfinitsitaavoq, tamatumalu nassataraa suliffeqarfinnut tamanut piffissami aalajangersimasumi suliaqartuunissaa.

Mittarfeqarfimmi pisortaaneq Henrik Estrup: ”Mittarfeqarfiit mittarfinnik ingerlatsinerup iluani annertunerpaamik ilisimannittuuvoq, taamaattumillu ilisimasatsinnik piginnaaneqarfitsinnillu ilalersuinissarput pissusissamisoorpoq. Ilaatigut Kalaalit Airportsip aamma Mittarfeqarfiit akornanni mittarfiup pisortaata Rita Müllerip attaviulernissaa akuerisimavarput, tamatumalu nassataraa suliffeqarfinnut tamanut piffissami takkuttussami suliaqartuulernissaa.”

”Suliassaq assorsuaq pissanganartoq Rita Müllerip qilanaarilereersinnaavaa, suliassamillu kivitsisinnaassuseqarneranut annertuumik tatiginnippugut,” Henrik Estrup oqarpoq.

Rita Müller ukiut 21-t Mittarfeqarfimmi sulinikuuvoq, tassannga ukiut arfineq pingasut Kangerlussuarmi mittarfimmi pisortatut ukiullu sisamat Nuummi mittarfiup pisortaatut.

”Periarfissaq assorsuaq pissanganartoq pissarsiaraara. Suliassarujussuusoq takusinnaavara, suleqatilli piginnaasaqarluartut suleqatigalugit naammassissaqqaarlugu ilisimavara,” oqarpoq.

Nuummi aamma Ilulissani mittarfiliornerit ingerlalluarput, 2023/24-milu mittarfiit piareersimanissaat naatsorsuutaavoq.

Ilaatigut ingerlatsinissamik akuersissuteqarnissap tungaanut ingerlatarissat Rita Müllerip ilaatigut ataqatigiissaassavai.

”Suliniummik aqutsinermut tunngasutut pingaarnertut akisussaaffik tigussavara, suliassaaleqiunnanngilangalu. Mittarfimmi sullissinerit tamaasa akuersissuteqarfigitissavagut. Mittarfinnut taakkununnga nutaanut pingasunut mittarfimmik ingerlatsinermut quppersakkat, ingerlatsinermut ilitsersuutit, ilinniagaqartitsinermut ilitsersuutit allallu suliassanut ilaapput,” Rita Müller oqarpoq.