Qaanaami immami annaassiniarnermik sungiusarneq

Sulisuminik Mittarfeqarfiit ilinniartitsiuarlunilu sungiusaajuarpoq, qanittukkullu sulisunut immami annaassiniarnermik sungiusartitsisoqarpoq.

Safety manager Filip Mathiesen: ”Sulinitta nalaani AFIS-ip napasuliaata ajunaarnersuaqarnermut kalerrisaaruteqarneratigut sungiusarneq aallartippoq. Timmisartoq mikinerusoq ataatsimik aquttulik orsussaarulluni kangerlummut nakkarnera sungiusaatigaarput. Piaartumik angallat aqqarparput, ”ajunaarfiliarlutalu”. Ujaasereerluta aquttua nassaaraarput, sikullu akornatigoorluta Qaanaami tulattarfimmut tamakkiisumik oqqukkiartorparput, ajoqusertoq isumaginnittussanut oqqullugu.

Aniguisitsineq, tigusineq, aamma MOB (mand over bord – inuk immamut nakkartoq), aammalu sikumit annaassineq sungiusalaareerlutigit angerlamut saappugut, atortuutigullu iluarsaateqqillugit. Tamatsinnut ualeq pikkunavissorpoq, pilersaarutillu malillugit suut tamarmik naammassipput.”

Mittarfeqarfiit tamarmik immami annaassiniartartussat ukiumut minnerpaamik aqqaneq-marloriarlutik sungiusartassapput.