Qaanaami ujaraaqqanik mittarfik aserfallatsaalineqartoq

Mittarfeqarfinni sulisut namminneerlutik Kalaallit Nunaanni ujaraaqqanik mittarfinni avannarlerpaaq aserfallatsaalivaat.

”Suliassat taamaattut siornatigut immikkut ilisimasalinnit suliaritittarsimavagut, ukioq mannali aserfallatsaaliineq sulisutta namminneerlutik suliaraat”, suliniutinut pisortaq Erneeraq Zeeb oqarpoq.

Ujaraakkanik mittarfiup qaavanik nungullarnaveeqqummik taarsersuinerup aallartinnginnerani maskiina aqqusinerni sulinermut atorneqartartoq graderi sumiissusersiummik GPS-ilerneqaqqaarpoq.

Erneeraq Zeeb: ”Mittarfiup qaavata drone-mik uuttortartinnissaanut Asiaq sulisussarsiaraarput. Mittarfiup qaava kingornatigut qarasaasiami titartarneqarpoq paasissutissallu taakku maskiinamut graderimut nassiunneqarlutik.”

Graderi aqqusinermi iluarsaassinermut atorneqartarpoq, aqquserngup qaavanik assigiissumik manissaanermut uanili mittarfiup qaavanik manissaanermut atorneqartarluni.

”Sulisugut ujaraaqqanik mittarfup qaavanik aatsaat siullerpaamik namminneerlutik ikiorneqaratik taarsiipput. Leica Geosystems sumiissusersiummik GPS-imik graderimut ikkussitipparput. Drone-mit paasissutissat qarasaasiamut nuunneqarput titartaanermullu programmi atorlugu mittarfinnut piumasaqaatinik naammassinnittunik mittarfiup qaassaa titartaganngortinneqarluni. Titartakkap graderip GPS-ianut nuunneqareermat mittarfimmi nutaamik nungullarnaveeqqummik qalliineq aallartinneqarpoq”.

Mittarfiup aserfallatsaalineqarnera Qaanaamut pilersaarutaasumik tikittussanik ajoqutaanngitsumik ingerlanneqarpoq.

”Aserfallatsaaliilluni sulineq nikerartissinnaasariaqarsimavarput ulluni marlunni-pingasuni timmisartoqartussaanngikkaangat aatsaat sulisugut aserfallatsaaliinermik suliaqartittarlugit. Sulineq 12. aggusti aallartinneqarpoq ujaraaqqat atugassat suliareqqaarneqartariaqarmata. Issilinnginnerani mittarfimmik aserfallatsaaliineq sapaatit akunnerini pingasuni-sisamani ingerlanneqarpoq”.

”Suliap aasaqqippat naammassineqarnissaa pilersaarutaavoq. GPS-imik aqutsissuteqarluni suliaqarneq iluatsilluarpoq aserfallatsaaliinerup ingerlanerani titartakkat iluarsineqartariaqarsimagaluarlutik. Sulisugut suliaminnik naammassiniaagamik pikkoreqaat naammassisaallu naammagisimaarutigeqaagut. Massakkut misilittagaqarlualersimapput ujaraaqqanillu mittarfiup ukiut tamaasa pisariaqaleraangalluunniit aserfallatsaalinissaa allanik sulisussarsiornata namminneerlutik suliarisinnaanngorlugu”, Erneeraq Zeeb oqarpoq.